UFC-ის ქართველმა ჩემპიონმა, ილია თოფურიამ, ამერიკის შეერთებული შტატების პრეზიდენტისგან, დონალდ ტრამპისგან, კიდევ ერთი გამორჩეული ყურადღება და უნიკალური საჩუქარი მიიღო. ტრამპმა დაუმარცხებელ მებრძოლს ე.წ. პრეზიდენტის „გამოწვევის მონეტა“ (Presidential Challenge Coin) გადასცა, რომელიც ამერიკულ კულტურაში განსაკუთრებული პრესტიჟითა და დატვირთვით სარგებლობს.
ეს ჟესტი კიდევ ერთხელ უსვამს ხაზს იმ მეგობრულ ურთიერთობას, რომელიც ქართველ ჩემპიონსა და ტრამპს შორის ჩამოყალიბდა.
საჩუქრის გადაცემისას დონალდ ტრამპმა თოფურიას მონეტის დანიშნულება და მასთან დაკავშირებული სახალისო ტრადიციაც აუხსნა. „თუ ბარში შეხვალ, ‘მონეტების გამოწვევას’ მოაწყობ და მას სამხედროებთან ან პოლიციელებთან ერთად ბარზე ასე დადებ… ვინც ამ გამოწვევაში მონაწილეობს — ვისაც ყველაზე დაბალი რანგის მედალიონი აღმოაჩნდება, ანგარიშსაც ის იხდის, გასაგებია? ეს კი ყველაზე მაღალია, რადგან პრეზიდენტისაა, რაც უმაღლესი რანგია“, — განუმარტა ტრამპმა ქართველ მებრძოლს.
აღნიშნული ტრადიცია ამერიკელ სამხედროებსა და სამართალდამცავებში ათწლეულებია არსებობს და დიდ პატივისცემას იმსახურებს. წესის თანახმად, თუ ჯგუფის რომელიმე წევრი თავის მონეტას მაგიდაზე დაატყაპუნებს, დანარჩენებმაც დაუყოვნებლივ უნდა წარმოადგინონ თავიანთი მედალიონები. ის, ვისაც ყველაზე დაბალი რანგის ან სტატუსის მონეტა აღმოაჩნდება, ვალდებულია, მთელი მაგიდისთვის სასმელი იყიდოს. შესაბამისად, რადგან ილიას პრეზიდენტის მონეტა აქვს, მასზე მაღალი რანგი ფიზიკურად არ არსებობს.
დონალდ ტრამპისა და ილია თოფურიას ახლო ურთიერთობა UFC-ის გულშემატკივრებისთვის უცხო ნამდვილად არ არის. ტრამპი შერეული საბრძოლო ხელოვნების დიდი მოყვარულია, ხშირად ესწრება ორგანიზაციის ღონისძიებებს და არაერთხელ გამოუხატავს საჯარო მხარდაჭერა და სიმპათია ქართველი ჩემპიონის მიმართ. თავის მხრივ, ილია თოფურიამაც მრავალჯერ გაუსვა ხაზი ტრამპთან პირად ნაცნობობას და მისდამი პატივისცემას, რისი კულმინაციაც მათ შორის გამართული არაერთი თბილი შეხვედრაა.ამ უნიკალური საჩუქრით ილია თოფურიამ კიდევ ერთი სიმბოლური „უპირატესობა“ მოიპოვა — ოღონდ ამჯერად ოქტაგონს მიღმა. პრეზიდენტის მონეტა მხოლოდ რჩეულთათვისაა განკუთვნილი და ის ხაზს უსვამს მფლობელის განსაკუთრებულ სტატუსს. ასე რომ, თუ ქართველი ჩემპიონი ოდესმე ამერიკელ სამხედროებთან ერთად ბარში მოხვდება, მას სასმლის ყიდვა ნამდვილად აღარ მოუწევს, რადგან ტრამპის საჩუქრით მას ნებისმიერ „გამოწვევაში“ გამარჯვება გარანტირებული აქვს.
