გვანცა დარასელიამ თავისი პოდკასტის ახალ გამოშვებაში მაყურებელს ბავშვობა, ოჯახის წარსული და მანამდე უცნობი ამბები გაუმხილა. გადაცემას განსაკუთრებული ემოცია შემატეს მისმა უახლოესმა ადამიანებმა – დედამ და რძალმა, რომლებმაც ტელეწამყვანზე გულწრფელად ისაუბრეს.
„სიტყვებით არ ითქმის, როგორი საამაყო გოგო და მშვენიერი მული ხარ. როცა თიანეთში ჩამოდის, იქაურობას ენერგია, სიხარული და სინათლე ეფინება, რაც ყველას გვაბედნიერებს. გვანცა არასდროს მინახავს მოწყენილი. ერთმანეთთან შემოქმედებითი კავშირი გვაქვს და საინტერესო პროექტებზე ვმუშაობთ. ბავშვებთანაც ფანტასტიკური ურთიერთობა აქვს და ჩემს ცხოვრებას ძალიან მიმარტივებს. ყოველ ზაფხულს, ვიდრე ჩამოვა, წინასწარ ვგეგმავთ ერთობლივ აქტივობებსა და გასვლის დროებს“, – აღნიშნა გვანცას რძალმა.
გვანცას დედამ 90-იანი წლების რთული პერიოდი გაიხსენა, როდესაც ოჯახს მძიმე გამოცდის გავლა მოუხდა. უსახლკაროდ დარჩენილებმა გადაწყვიტეს, პატარა გვანცა და მისი ძმა, ვანიკო, თიანეთში, ბებია-პაპასთან გაეგზავნათ.
„8 თვის იყავი, თიანეთში რომ წაგიყვანეთ – მაშინ მაისის ბოლო იყო. მთელი ზაფხული მეც იქ გავატარე, თუმცა მოგვიანებით, ოჯახური პირობების გამო, უბინაოდ დავრჩით და 90-იანების კრიზისი ჩვენც მწვავედ შეგვეხო. მართალია, მუდმივად ვმუშაობდი და ერთი დღეც არ ვყოფილვარ უმუშევარი, მაინც იძულებული გავხდი, ბავშვები აქ ჩამომეყვანა. იმ პერიოდში თბილისში არც გაზი იყო, არც წყალი, არც შუქი და არც პური, თიანეთში კი, საბედნიეროდ, დენიც გვქონდა და გაზიც, სახლშიც თბილოდა და შუქიც ანთებდა.
გვანცამ საბავშვო ბაღი თიანეთში დაამთავრა. წარიდგინეთ, რა განცდაა, როცა სხვა გამოსავალი არ გაქვს, შვილს გულიდან იგლიჯავ და ტოვებ, რადგან საკუთარი სახლი არ გაქვს და არ იცი, სად წაიყვანო – მაშინ ჩვენთვის მთავარი თავშესაფარი სწორედ ეს ოჯახი იყო. გვერდით გვედგნენ მზრუნველი ბებია, პაპა და ბებიას დედა, რომელმაც ბავშვების აღზრდაში უდიდესი როლი ითამაშა.
ვანიკო სკოლაშიც აქ შევიდა და, როგორც ძმა სწავლობდა, გვანცაც ისე მიჰყვებოდა – ის უკვე 5 წლისა გაზეთებს კითხულობდა“, – ყვება გვანცას დედა.
