ხანგრძლივი ავადმყოფობის შედეგად გუშინ დილით გარდაიცვალა ვლადიმერ (ვაკო) ნადარეიშვილი. იგი გახლდათ აფხაზეთის ავტონომიური რესპუბლიკის უმაღლესი საბჭოს ყოფილი თავმჯდომარის თამაზ ნადარეიშვილის ვაჟი.
როგორც ახლობლებეი სოციალურ ქსელში წერენ, ახალგაზრდა კაცი თვეზე მეტია უგონო მდგომარეობაში რეანიმაციაში იწვა და პროგნოზები ძალიან ცუდი იყო, თუმცა მათ გულის სიღრმეში მაინც იმედი ჰქონდათ სასწაულის. სამწუხაროდ, ვაკო ნადარეიშვილი კლინიკაშივე გარდაიცვალა.
სამძიმრის წერილი გაავრცელა აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა.
“ღრმა მწუხარებას გამოვთქვამ აფხაზეთის ავტონომიური რესპუბლიკის უმაღლესი საბჭოს ყოფილი თავმჯდომარის თამაზ ნადარეიშვილის შვილის ვლადიმერ ნადარეიშვილის გარდაცვალების გამო, რომელიც ბოლო რამდენიმე თვეა, აფხაზეთის მთავრობაში ჩემი მრჩევლის პოზიციას იკავებდა.
აფხაზეთის მთავრობის სახელით ვუსამძიმრებ გარდაცვლილის ოჯახის წევრებს, ახლობლებს და კოლეგებს ამ დიდ დანაკარგს”, – აღნიშნულია სამძიმრის წერილში.
44 წლის ვლადიმერ ნადარეიშვილის და, ანი ნადარეიშვილი თავდაცვის ყოფილი მინისტრის, ბაჩო ახალაიას მეუღლეა.
