ნანუკა ჟორჟოლიანის ქალიშვილი, აქტივისტი მარიამ გეგუჩაძე ემოციურ პოსტს ავრცელებს.
„სანამ ბებიაჩემის დიაგნოზს გავიგებდით, ჩემთან ცხოვრობდა. დიდი ხანი გვეძინა ერთად, შესაბამისად, მესმოდა, როგორ სუნთქავდა ცუდად და ვხვდებოდი, რომ პრობლემა ჰქონდა, მაგრამ არ ვიცოდი – რა პრობლემა.
ძალიან შემთხვევით და ბოლო სტადიაში გავიგეთ მისი დიაგნოზი (ფილტვის სიმსივნე) და გაგებიდან, რამდენიმე თვეში გარდაიცვალა.
იმის შემდეგ არ გასულა კვირა, როდესაც არ მიფიქრია, რომ მაშინ მე სათანადო პანიკა რომ ამეწია – იქნებ დიაგნოზი ისეთ დროს დაგვესვა, მისი გადარჩენა რომ შეგვძლებოდა? ალბათ, ცხოვრების ბოლომდე შემჭამს ეს ფიქრი.
ვუსმინე გიორგი ახობაძის სიტყვას, სადაც აღწერს, როგორ სასიცოცხლოდ მნიშვნელოვანი იყო გიორგის ცოდნა და გამოცდილება დედამისის მოვლის დროს. ინფიცირების პრევენციისთვის როგორი მნიშვნელოვანი იყო, რომ პაციენტს არ ჰქონოდა ბევრ ადამიანთან კონტაქტი. გიორგი თავისი პროფესიონალიზმით და სიყვარულით უმკლავდებოდა ყველა გამოწვევას და ასე აცოცხლებდა დედას, რომელიც გიორგის უკანონო დაკავებიდან 1 თვეში გარდაიცვალა.
ამ ყველაფერში დანაშაულს, სისასტიკესა და ბოროტებას თუ ვერ ხედავთ, მოვა დრო, როდესაც ყველა ადამიანი, რომელიც ახლა რეჟიმს წარმოადგენთ – შეიძულებთ საკუთარ თავს ჩუმად ყოფნის გამო. მთელი ცხოვრება მოგიწევთ ამ ადამიანის ტრაგედიით ცხოვრება და ამ სიმძიმის საკუთარი მხრებით ტარება“, – წერს მარიამ გეგუჩაძე.
