მშრალი ატრია, იგივე სწრაფი მოსამზადებელი სუპები, ფართოდ გამოიყენება მსოფლიოში, თუმცა ბოლო წლებში დაფიქსირდა ტრაგიკული შემთხვევები, როდესაც ადამიანებმა უმი ატრია მიირთვეს და დაიღუპნენ.
რამდენიმე დღის წინ ეგვიპტის დედაქალაქ კაიროში, 13 წლის ბიჭი გარდაიცვალა მას შემდეგ, რაც სამი პაკეტი უმი ატრია შეჭამა. ნახევარ საათში მას ძლიერი მუცლის ტკივილი, ოფლიანობა და ღებინება დაეწყო. ექსპერტიზამ დაადასტურა, რომ ატრია არ იყო მოწამლული, თუმცა გარდაცვალება გამოწვეული იყო საჭმლის მომნელებელი სისტემის გაუვალობით და მწვავე ნაწლავური უკმარისობით.
მსგავსი შემთხვევა 2024 წლის მაისშიც მოხდა, ინდოეთის ქალაქ პილიბჰიტში, როდესაც 7 წლის ბიჭი გარდაიცვალა ნუდლისა და ბრინჯის ჭამის შემდეგ. მისი ოჯახის რამდენიმე წევრიც საავადმყოფოში მოათავსეს, მათაც ძლიერი მუცლის ტკივილი და დიარეა აღენიშნებოდათ, რაც საკვების მოწამვლის კლასიკურ ნიშნებზე მიუთითებდა.
მშრალი, სწრაფი მომზადების ატრია პირდაპირ არ არის მომაკვდინებელი, მაგრამ საჭმლის მომნელებელი სისტემისთვის სერიოზულ რისკებს წარმოადგენს, განსაკუთრებით ბავშვებსა და ახალგაზრდებში.
პრობლემა იმაშია, რომ ეს პროდუქტები უმი სახით ძალიან მკვრივი, რთულად მონელებადი პროდუქტებია.
ატრია, რომელიც ჯერ არაა დარბილებული ან მოხარშული, რთული დამუშავების კოლაგენური პროტეინებითა და შაქრებით არის სავსე. ჩვეულებრივი მომზადების დროს ცხელი წყალი ამ მასას რბილ და უფრო მონელებად სურსათად აქცევს. თუ ეს ნაერთები უმია, კუჭსა და ნაწლავში ისინი შეიძლება გაჭედოს, რაც იწვევს მუცლის მწვავე ტკივილს, ღებინებას, ნაწლავების სპაზმს და ზოგიერთი შემთხვევაში – ნაწლავის გაუვალობას.
ბავშვები და ახალგაზრდები უფრო მგრძნობიარენი არიან ასეთ ეფექტზე, რადგან მათი კუჭის მჟავა და ნაწლავის მიკროფლორა სრულად განვითარებული არაა.
ადამიანები ისედაც მიირთმევენ მშრალ ხილს, ზოგიერთ უმ საკვებს, მაგრამ თანამედროვე სწრაფი მომზადების ატრიები შეიცავს უამრავ მარილს, დანამატსა და სქელ მასას, რომელსაც ორგანიზმი ვერ უმკლავდება, განსაკუთრებით დიდ პორციებს.
წყარო : Mshoblebi.ge
