რამდენიმე დღის წინ ნარკოტიკის ზედოზირებით ახალგაზრდა მამაკაცი გარდაიცვალა. დაღუპული ექიმი ანესთეზიოლოგი გიორგი გელდიაშვილია.
ახალგაზრდა მამაკაცი 14 თებერვალს დაკრძალეს. შვილმკვდარი დედა ნინო გელდიაშვილი მომხდარი ტრაგედიის შემდეგ სოციალურ ქსელში ვრცელ მიმართვას ავრცელებს.
ექიმის დედა, ნინო გელდიაშვილი, მამა შალვა კეკელიას მიმართავს:
„გიორგი იყო ერთადერთი მორწმუნე ჩვენი ოჯახიდან. მე არც ერთი შვილი არ მომინათლავს. გიორგიმ თვითონ მოინდომა მონათვლა, მაგრამ ბოლო პერიოდში განსაკუთრებით უნდოდა, რომ ყოფილიყო ეკლესიასთან ახლოს. მე მადლობა მინდა ვუთხრა მამა იოანეს, გვერდში ედგა გიორგის. მოძღვარს კი არ დავასახელებ. ბოლო წერილი ვნახე, უთხრა, რომ ძალიან მინდა ღმერთთან ახლოს ვიყოო. არ მიცხოვრია ეკლესიურადო, დამეხმარეთო – მას გიორგისთვის არ ეცალა.
გიორგი რომ გარდაიცვალა, მე არანაირ მნიშვნელობას არ ვანიჭებ არც წესის აგებას, არც არაფერს, უბრალოდ გიორგის სურვილის ასრულება მინდოდა და ამიტომ დავურეკე მამა იოანეს და ვთხოვე, დამეხმარეთთქო. თურმე, მე, შვილმკვდარი დედა, ვიღაც ქორეპისკოპოსს უნდა ვეახლო და ვთხოვო, რომ ნება დამრთოს, რომ ჩემს შვილს წესი აუგოს. ღმერთის მსახური თვითონ მიდის გაუბედურებულ ადამიანთან ალბათ და თვითონ აძლევს მას ნუგეშს. არავის სახელის დასახელება არ მინდა.
მე მყავს ერთი ძალიან კარგი ახალი მეგობარი, რომელიც მთელი სულით და გულით მეხმარება ამ გაჭირვების ჟამს. მამა შალვა კეკელიამ 15 წუთში მანდ ვიქნებიო. ადამიანს გადარჩენა უნდოდა და მაგაზე უარს როგორ ვეტყვიო. რომ მოვიდა მამა შალვა, ვუთხარი, ნეტა იცოდეთ, რამდენჯერ გამიკრიტიკებიხართ. ვიციო, მაგას რა მნიშვნელობა აქვსო, ახლა გიორგის სულია გადასარჩენიო. თავის ეკლესიაშიც გადაიყვანა. ბოლო დღეს იქ დავასვენეთ.
არ ვამბობ, რომ ამის შემდეგ უდიდესი მორწმუნე გავხდი, მაგრამ უდიდესი პატივისცემა მაქვს ამ ადამიანის მიმართ – გიორგის სურვილი ასრულდაო, თქვენს თვალებში ცოტა შვება დავინახეო. ეს ჩემთვის ფასდაუდებელი პატივია. საქვეყნოდ მინდა, უდიდესი მადლობა მამა შალვას, რომელიც არც სინოდის გადაწყვეტილებას დაელოდა, რომელიც მერე კი დადებითი მოვიდა. ისე მოეფერა ჩემს შვილს. მინდა, დღეს უდიდესი პატივისცემა გამოვხატო მისდამი. მინდა მას უდიდესი მადლობა ვუთხრა. მამა შალვა, დიდი, დიდი მადლობა თქვენ”, – ამბობს ვიდეომიმართვაში შვილმკვდარი დედა“, – ამბობს გარდაცვლილის დედა.
