კვერცხი, თაფლი, ლიმონი და კონიაკი – 4 პროდუქტით უნივერსალურ რეცეპტს ტრადიციული მედიცინის სპეციალისტი, ენდოკრინოლოგი, ნინო ვაშაკიძე, გადაცემაში “დილა მშვიდობისა საქართველო” გვიზიარებს. ეს ჯადოსნური ხსნარი ბევრი დაავადებისაგან განკურნებაში დაგეხმარებათ, იმუნიტეტსაც გაგიძლიერებთ და თქვენს ორგანიზმს გააჯანსაღებს:
– ამ ოთხი პროდუქტის კომბინაცია განსაკუთრებულია. ეს რეცეპტი ჩემი მეუღლის დიდმა ბებიამ შვილიშვილისთვის გამოიყენა. შეუძლოდ იყო და ავადობის ჟამს გაუკეთა. საინტერესო იყო ის, რომ ვერანაირმა ექიმმა ვერ უშველა, ქრონიკული დაღლილობის სინდრომი ჰქონდა. აღმოჩნდა, რომ ეს გურიაში გავრცელებული რეცეპტი იყო და კეთდებოდა კვერცხის, თაფლის, შაქრის, იმიტომ, რომ გურიაში პროდუქტები იოლად ფუჭდებოდა და შაქარი ინახავდა, კონიაკისა და ლიმონისაგან. ეს ადამიანი 2 კვირაში აბსოლუტურად გამოჯანმრთელდა… 3 წლიდან ჩემს ყველა შვილს ვაძლევდი.
აღმოჩნდა, რომ კვერცხის ნაჭუჭი ზუსტად იმ თანაფარდობაში მიკროელემენტებს შეიცავს, რაც ჩვენს ორგანიზმშია. ნაჭუჭი აპკის დონემდე უნდა დავიდეს, მაგარი არ უნდა იყოს. ასეთ შემთხვევაში, 80%-ს წვრილი ნაწლავი შეიწოვს. თუ ჩვენს ორგანიზმში მიკროელემენტების თანაფარდობა აბსოლუტურ ნორმაშია, სულ რომ ვირუსებისა და ბაქტერიების ოკეანეში ჩაგვსვან, არაფერი დაგვემართება. ვერაფერი მოგვერევა…
გურულებმა ასეთი რამ მოიფიქრეს: 1-ლიტრიან ქილაში 10 კვერცხს დებდნენ. ოღონდ, ახალი, 5-7 დღის სოფლის კვერცხი უნდა იყოს. უნდა დავაწუროთ ლიმონი. ლიმონის წვენმა კვერცხი უნდა დაფაროს. დნობის პროცესი იწყება. კვერცხია მაცივარში ნამყოფი არ უნდა იყოს. ასევე, ჩვენი ქათმები ანტიბიოტიკებით ნაკვები არ უნდა იყვნენ. კვერცხიანი ქილა ბნელ, ცივ ადგილას უნდა მოვათავსოთ. ნაჭუჭი 10-14 დღის განმავლობაში დნება. ამ დროის შემდეგ აღმოვაჩენთ, რომ კვერცხი კვერცხის აპკშია დარჩენილი. კვერცხი ფრთხილად უნდა გადმოვიღოთ. მაქსიმალურად უნდა ვეცადოთ, რომ არანაირი მეტალი არ გამოვიყენოთ. ლიმონში C ვიტამინია. გარდა ამისა, ლიმონი ხელს უწყობს, რომ ნაწლავმა ყველა მიკროელემენტი შეიწოვოს.
200 მილილიტრი კონიაკი, 200 გრამი თაფლი, 10 ცალი კვერცხი და 10-15 ლიმონი დაგვჭირდება. გვჭირდება 5 კვერცხის გული. აპკს რომ გავხეთქავთ, აღმოვაჩენთ, რომ დენატურირებული ცილაა. ცილას ვაგდებთ, გულს ვიყენებთ.
5 კვერცხის გულს გურული რეცეპტით, 200 გრამი შაქარი უნდა დავამატოთ, მაგრამ მე 100 გრამს ვიყენებ. გოგლი-მოგლი გავაკეთოთ. კარგად რომ ავთქვეფთ, დავამატოთ თაფლი, შემდეგ ქილაში დარჩენილი ლიმონიანი ნალექი ჩავასხათ და კვლავ ავთქვიფოთ. შემდეგ კი კონიაკი. კარგად უნდა ავურიოთ. აუცილებლად მუქ ბოთლებში უნდა ჩავასხათ და მაცივარში შევდგათ. თითო გამოყენების წინ უნდა ავანჯღრიოთ.
ბავშვებს 3 წლიდან ვაძლევდი და ავად არასდროს გამხდარან. 12 წლამდე სვამდნენ, მერე აღარ უნდოდათ. პატარებთან 1 ჩაის კოვზი გამოვიყენე. დილა-საღამოს, ჭამამდე 20 წუთით ადრე. შემდეგ სუფრის კოვზი გამოვიყენე, ბოლოს 50 გრამამდე გავზარდე. უფროსების დოზა 50 გრამია. დღეში 2-3-ჯერ უნდა გამოვიყენოთ. გააჩნია ადამიანის იმუნიტეტს.
აფთიაქში რომ ვიტამინებს ვყიდულობთ, ორგანიზმი 20-30% შეიწოვს. კვერცხის გული ყველა ამინომჟავას შეიცავს, რომლისგანაც ჩვენი ცილები შედგება. ამიტომ, ძალიან მნიშვნელოვანია. კონიაკი პიროღვინის მჟავას შეიცავს, რომელიც სისხლძარღვებისთვის ძალიან კარგია. თაფლი სერიოზული ალერგენია, თუმცა ამ შემთხვევაში მიკროდოზით ვიყენებთ.
ეს ყველაფრის წამალია. იმუნიტეტის გაძლიერებისთვის ფანტასტიკურია. გურიაში მას ფილტვების წამლად მოიხსენიებდნენ. ოსტეოპოროზებისთვის ძალიან კარგია. რა ვიტამინი და მიკროელემენტიც გვაკლია, ორგანიზმი იმას შეიწოვს.
საკუთარ თავზე ასეთი რამ მოვსინჯე: დღეში 3-ჯერ ვიღებდი და არაფერს ვჭამდი. აბსოლუტურად არაფერი მიგრძნია. ბალანსს იმდენად აწესრიგებდა, არც მშივდებოდა.
ძალიან ჭკვიანი რეცეპტია. არანაირი უკუჩვენება არ აქვს. ერთადერთი დიაბეტით დაავადებული ადამიანების შემთხვევაში, ფრთხილად, ჩემი მეთვალყურეობის ქვეშ გამოვიყენეთ. ასევე, თაფლზე ალერგია არ უნდა გქონდეთ.
როგორც კი სიცივეები იწყებოდა, მაშინ ვაკეთებდი. რომ დავამზადებთ და მაცივარში შევდებთ, ახალ პარტიას გავაკეთებთ, რომელიც 14 დღეში დამზადდება.
