ბუდუ ზივზივაძის მამა გიორგი გველესიანს მიმართავს:
,,არ ვაპირებდი პასუხს, მაგრამ მართლა მაინტერესებს, ამ ბიჭმა [გიორგი გველესიანი] გამაგებინოს, რომელმა ძალებმა იმოქმედეს და დაწნეხეს ფეხბურთელები (პირველი მე ვიქნები, ვინც პასუხს მოსთხოვს ჩემ შვილს, თუ ვინმეს გავლენით რაიმე თქვა).
მოღალატეებს რომ უწოდებს თანაგუნდელებს, ნეტავ სინდისი არ აწუხებს?
რა გამოდის, 26 ფეხბურთელიდან 4-მა გაუძლო ძალების დაწნეხვას?
რად უნდა კონსტიტუციის დაცვას და რეფერენდუმის შედეგებს ვინმე ძალების ზეწოლა? ვალდებულები არა ვართ?”, – დაწერა Facebook-ზე საქართველოს ეროვნული ნაკრების ფეხბურთელის, ბუდუ ზივზივაძის მამამ, კახა ზივზივაძემ. ამით ის ფეხბურთელ, გიორგი გველესიანის გუშინდელ ინტერვიუს გამოეხმაურა, რომელიც მან Geo Team-ს მისცა.
ინტერვიუში გველესიანმა თქვა, რომ 2024 წელს საქართველოს ნაკრების ფეხბურთელებს გარკვეული ძალებისგან წნეხი ჰქონდათ – ევროპის მხარდამჭერი განცხადებები დაედოთ.
“ფეხბურთელებს წნეხი ჰქონდათ სხვადასხვა ძალებისგან, რომ მხარდამჭერი პოსტები დაედოთ. უმეტესობამ დაწერა, “ჩვენი გზა არის ევროპაში” – მე შეკითხვა დავსვი, ვიცით რას მოუტანს ეს ჩვენს ეკონომიკას? რაიმე კავშირში შესვლა რატომ არის ჩვენი პანაცეა და მაშინდელი ძალები მე თავს დამესხნენ”, – თქვა მან ინტერვიუში.
ასევე, გველესიანი ამბობს, რომ “2024 წელს საქართველო იდგა ეგზისტენციალური საფრთხის ქვეშ – ერთი მხრივ, იყო არჩევანი ერთ პარტიასა და მეორეს მხრივ, კოლექტიურ ქვეყნის მოღალატეებს შორის. ჩემი ღრმა რწმენით, სანამ ისინი არ მოშორდებიან ქართულ პოლიტიკურ ველს, ძალიან რთულია რაიმე სიკეთეზე საუბარი.
მაშინდელი ძალები მე თავს დამესხნენ, მაგრამ ძალიან გაუჭირდებათ, რამე მატკინონ. რაც უნდა იარლიყი მომაკერონ, ეს იმას არ ნიშნავს, რომ ქართულ ოცნებას ყველაფერში ვეთანხმებოდი, ან ვეთანხმები. მაქვს უამრავი შეკითხვა, მაქვს უამრავი ჩემი პრეტენზიები.”
