სევასტოპოლის ერთ-ერთ სკოლაში მძიმე შემთხვევა მოხდა. სელფის გადაღების დროს მეორე სართულის აივანი ჩამოინგრა, რის შედეგადაც მე-11 კლასის მოსწავლეები სიმაღლიდან გადმოვარდნენ.
ბოლო მონაცემებით, შემთხვევის დროს აივანზე 9 მოზარდი (6 ბიჭი და 3 გოგონა) იმყოფებოდა. თვითმხილველების თქმით, ბოლო ზარზე ერთობლივი ფოტოების გადაღებისას, მოსწავლეებმა აივანზე ხტომა დაიწყეს, რამაც კონსტრუქციის ჩამოშლა გამოიწვია.ყველა მოზარდმა სხვადასხვა სიმძიმის დაზიანება მიიღო, მათ შორის აღენიშნებათ ყბის, მენჯისა და ლავიწის ძვლის მოტეხილობები. განსაკუთრებით მძიმეა ერთ-ერთი გოგონას, 17 წლის ეკატერინეს მდგომარეობა, რომელმაც ვარდნისას თავის არეში სერიოზული ტრავმა მიიღო და გონება დაკარგა.
რუსული მედია წერს, რომ შენობას ახლახან ჩაუტარდა სარეაბილიტაციო სამუშაოები. ოფიციალური მონაცემებით 2020 წელს სკოლის კაპიტალურ რემონტზე დაახლოებით 3.8 მილიონი რუბლი დაიხარჯა. 2024 წელს შენობა კვლავ განახლდა – შეიცვალა კომუნიკაციები, კარ-ფანჯრები და შეკეთდა ფასადი.
რატომ ვერ გაუძლო კონსტრუქციამ დატვირთვას, ამას გამოძიება დაადგენს. ფაქტზე უკვე აღიძრა სისხლის სამართლის საქმე. ადგილზე მობილიზებულია ყველა საგანგებო სამსახური, პროცესს კი პროკურატურა აკონტროლებს.
