თბილისში ცოლ-ქმრის მკვლელობის სავარაუდო მოტივის შესახებ, მედიისათვის ახალი დეტალები გახდა ცნობილი – მოკლულები ნანა ფირანიშვილი და სოსო სუჯაშვილი არიან.
მათი ნათესავების ინფორმაციით, ტრაგედიას წინ უძღოდა წლების განმავლობაში მიმდინარე დავა უძრავ ქონებასთან დაკავშირებით.
ბრალდებულ მამაკაცს სხვა პირისგან თანხა ჰქონდა ნასესხები, თუმცა ვალის დაბრუნება ვერ შეძლო, რის შემდეგაც ცინცაძის ქუჩაზე მდებარე ბინა დაკარგა.
აღნიშნული უძრავი ქონება ნანა ფირანიშვილისა და მისი მეუღლის, სოსო სუჯაშვილის საკუთრებაში გადავიდა.
ისინი ყოფილი მფლობელისგან საცხოვრებლის ნებაყოფლობით გათავისუფლებას თითქმის 8 წლის განმავლობაში ითხოვდნენ, თუმცა მხარეებს შორის შეთანხმება ვერ შედგა.
მოგვიანებით კი ცოლ-ქმარმა შესაბამის უწყებას იძულებითი გამოსახლების მოთხოვნით მიმართა.
უკვე გუშინ, 11 ნოემბერს, ბრალდებული კაცი ცოლ-ქმარს საცხოვრებელი კორპუსის სადარბაზოსთან დახვდა და ორივე მათგანი ცეცხლსასროლი იარაღით ჩაცხრილა.
თავდამსხმელი დაკავებულია. გამოძიება დამამძიმებელ გარემოებებში განზრახ მკვლელობისა და ცეცხლსასროლი იარაღის მართლსაწინააღმდეგო შეძენა, შენახვა და ტარების მუხლებით დაიწყო.
დანაშაული 16 დან 20 წლამდე ვადით, ან უვადოდ თავისუფლების აღკვეთას ითვალისწინებს.
