კოლუმბიის ქალაქ ბუგას თავზე ამოუცნობი მფრინავი ობიექტი, მეტალის სფერო პირველად 2 მარტს შენიშნეს. მოწმეების თქმით, იგი მოგვიანებით მიწაზე დაეშვა და მას შემდეგ კვლევის საგნად იქცა, მათ შორის მეცნიერთათვის, რომლებიც მისი წარმომავლობის დადგენას ცდილობენ.
ერთ-ერთი მკვლევარი, რომელიც ობიექტს იკვლევს, ხოსე ლიოს ველასკესია. მისი თქმით, სფეროს ზედაპირზე არ შეინიშნება არანაირი დაზიანების კვალი, რაც ჩვეულებრივად ადამიანის მიერ შექმნილ ობიექტებზეა ხოლმე დამახასიათებელი. ეს გარემოება, მისი განმარტებით, აძლიერებს ეჭვს, რომ შესაძლოა ობიექტს უცხოპლანეტურ წარმოშობასთან ჰქონდეს კავშირი.
ამავდროულად, სან დიეგოს უნივერსიტეტის ფიზიკისა და ბიოფიზიკის დეპარტამენტის წარმომადგენელი, ჯულია მოსბრიჯი, შედარებით ფრთხილი მიდგომისკენ მოუწოდებს. Fox News Digital-თან საუბრისას მან აღნიშნა:
“ის ჩემს თვალში ხელოვნების ძალიან მაგარ პროექტს უფრო ჰგავს”, – თქვა მოსბრიჯმა და საზოგადოებას მოუწოდა, რომ „წინასწარი დასკვნების გამოტანისგან თავი შეიკავონ.”
მოსბრიჯი განმარტავს, რომ მსგავს შემთხვევებთან მეცნიერება წლების განმავლობაში მრავლად შეხვედრია:
“გულწრფელად რომ ვთქვათ, ათწლეულების განმავლობაში ვაკვირდებოდით ამოუცნობ ანომალიურ ფენომენებს, ფედერალურმა მთავრობამაც აღიარა, რომ არსებობს ისეთი რაღაცები, რაც ჩვენთვის ამოუხსნელია, მაგრამ ჩვენ შესწავლას გავაგრძელებთ”, – განაცხადა ფიზიკოსმა.
მიუხედავად სკეპტიციზმისა, მოსბრიჯი არ გამორიცხავს, რომ ობიექტს მართლაც არაამქვეყნიური წარმოშობა ჰქონდეს:
“სანამ გადავწყვეტთ, რომ რაღაც ანომალია ან უცხოპლანეტელებს უკავშირდება, ობიექტი ჯერ ისეთ ჯგუფს გადავცეთ, როგორიცაა Galileo Project და ისინი დაადგინენ, მართლაც ადამიანის შექმნილია ობიექტი, თუ არა”, – დასძინა მან.
სფეროს წარმომავლობის იდუმალება და მეცნიერებს შორის განსხვავებული მოსაზრებები ამ მოვლენას კიდევ უფრო საინტერესოს ხდის. კვლევა გრძელდება, ხოლო საბოლოო პასუხისთვის დრო და მეცნიერული ანალიზია საჭირო.
