2025 წლის Tbilisi Open Air 24 მაისს გაიხსნა და ტრადიციულად Lisi Wonderland-ის ტერიტორიაზე ჩატარდა. წლევანდელი ფესტივალი უცხოელი არტისტების გარეშე, სრულიად ახალი ფორმატით წარდგა მსმენელის წინაშე. ორი დღის განმავლობაში, სცენა მთლიანად ქართველ მუსიკოსებს დაეთმო და განსაკუთრებული ყურადღება მუსიკალურ კოლაბორაციებზე გაკეთდა.
სპეციალურად მოწვეულ სტუმრებს შორის იყვნენ პაატა ბურჭულაძე, ნანი ბრეგვაძე, მერაბ სეფაშვილი, გიული ჩოხელი, გიორგი უშიკიშვილი და სუხიშვილების ანსამბლი. სწორედ ამ უკანასკნელის ხელმძღვანელის, ნინო სუხიშვილის გამოსვლამ 25 მაისს აუდიტორიის მნიშვნელოვანი ყურადღება მიიპყრო.
სცენიდან მან მკაფიო განცხადება გააკეთა:
“ჩვენ ვართ ქრისტიანული ქვეყანა, დიდება უფალს! ჩვენი დასი ემიჯნება იმ სიტყვას, რომელიც აქ გაჟღერდა, რომელიც მკრეხელური იყო ჩვენი გაგებით. ჩვენ ამას არ ვეთანხმებით, ჩვენი დევიზი ყოველთვის იყო – ენა, მამული, სარწმუნოება…”
ნინო სუხიშვილის ამ განცხადებამ საზოგადოებაში გაურკვევლობა და კითხვა გამოიწვია – ვის მიმართ იყო ის მიმართული და რომელ ტექსტს მიიჩნია მიუღებლად?
გავრცელდა რამდენიმე ვერსია, მათ შორის ისიც, რომ სუხიშვილს შესაძლოა ჰომოფობიასთან დაკავშირებული ტექსტების მიმართ გაეკეთებინა პროტესტი, თუმცა საბოლოოდ თავად კომენტარის ავტორმა განმარტა, კონკრეტულად ვისაც გულისხმობდა.
მოკლე კომენტარში, რომელიც მან მოგვიანებით მედიასთან გააკეთა, ნათლად აღნიშნა:
“ჩემს ნათქვამში იგულისხმებოდა არჩილ გულედანის ნამღერი სიმღერის ტექსტი, და გთხოვთ მეტი შეკითხვებით ნუ შემაწუხებთ, შეუძლოდ ვარ, გავცივდი გუშინ.”
როგორც გაირკვა, საუბარია პროექტ “მწვანე ოთახის” ძველ სიმღერაზე სახელწოდებით “MAMA”, რომელიც YouTube-ზე 2013 წლიდან არის ატვირთული. სიმღერის ტექსტი შეიცავს მკვეთრ ტონალობას, აღნიშნულია ისეთი თემები, როგორებიცაა “ჯვრები”, “შავი ჯიპები”, და მასში მკაფიოდ იგრძნობა საბჭოთა და რუსული გავლენის წინააღმდეგ პროტესტი.
მიუხედავად იმისა, რომ ნინო სუხიშვილმა მკაფიოდ დაასახელა მიზეზი, საკუთარი დასის ემიჯნოს კონკრეტულ ტექსტს – დისკუსია მის განცხადებაზე მაინც არ ცხრება. საზოგადოების ნაწილი მხარდაჭერით შეხვდა მის პოზიციას, ნაწილი კი გამოხატვის თავისუფლების შეზღუდვად აღიქვამს.
