მარშმელოუ – ტკბილეული, რომელიც მცირეწლოვნებისთვის შესაძლოა, სასიკვდილო აღმოჩნდეს.
რბილი ტექსტურის მიუხედავად, პოპულარული ტკბილეული ბავშვებში დახრჩობის სერიოზულ საფრთხეს ქმნის. ექიმები მშობლებს განსაკუთრებული სიფრთხილისკენ მოუწოდებენ.
მარშმელოუ, რომელსაც ბავშვებს ხშირად სთავაზობენ სადღესასწაულო ღონისძიებებსა თუ კაფეებში, მცირეწლოვნების სიცოცხლისთვის შესაძლოა საშიში აღმოჩნდეს. უცხოური მედიისა და სამედიცინო სფეროს წარმომადგენელთა განცხადებით, პროდუქტის რბილი სტრუქტურა მშობლებს ხშირად მცდარ წარმოდგენას უქმნის მისი უსაფრთხოების შესახებ.
ტრაგიკული შემთხვევა და საგანგაშო ექსპერიმენტები
აღნიშნული საფრთხის რეალურობას აშშ-ში, მასაჩუსეტსის შტატში მომხდარი ტრაგედიაც ადასტურებს, სადაც 11 წლის გოგონა მეგობრის დაბადების დღეზე მარშმელოუთი დაიხრჩო. შემთხვევის ადგილზე მისულმა მაშველებმა მოზარდს სასუნთქ გზებში გაჭედილი ტკბილეული აღმოუჩინეს.
პროდუქტის სპეციფიკურ საფრთხეზე ირლანდიელი პედიატრიც ამახვილებს ყურადღებას. ექიმმა თვალსაჩინოებისთვის ექსპერიმენტი ჩაატარა: მარშმელოუ წყალში დაასველა და გამჭვირვალე მილში მოათავსა. დასველების შედეგად ტკბილეული წებოვანი გახდა, მილში გაიჭედა და მისი ამოღება თითქმის შეუძლებელი აღმოჩნდა.
ანალოგიური ცდა ჩაატარა ავსტრალიელმა ყოფილმა პარამედიკოსმაც, რომელმაც მარშმელოუ ყურძენს შეადარა. თუ სასუნთქი გზების მოდელიდან ყურძნის მარცვლის გამოდევნა ზურგზე რამდენიმე დარტყმით გახდა შესაძლებელი, მარშმელოუ მილის კედლებს მიეკრო და შიგნით დარჩა.
რა ხდის მარშმელოუს ასეთ საშიშს?
სპეციალისტების განმარტებით, მთავარ რისკ-ფაქტორს ფორმისა და ტექსტურის კომბინაცია ქმნის:
მისი ზომა და ფორმა იდეალურად ერგება ბავშვის სასუნთქ მილს.
წებოვნება: დასველებისას ის რეზინისებრი და წებოვანი ხდება, რაც პირველადი დახმარების სტანდარტულ ილეთებს ეფექტურობას უქვეითებს.
მცირეწლოვნებს ღეჭვისა და ყლაპვის რეფლექსები სრულყოფილად განვითარებული არ აქვთ, რის გამოც საკვებს ხშირად დაუღეჭავად ყლაპავენ.
