დღეს დილიდან მომღერალი და სამცხე-ჯავახეთის გუბერნატორის მოადგილე ზურა ხაჩიძე სკანდალში გაეხვა. მიზეზი თბილისში მდებარე რესტორნის (“ჩემთან“), მიერ გავრცელებული ვიდეორგოლი გახდა.
აღნიშნულ ვიდეოში, რომელიც სანქტ-პეტერბურგში, ქრისტეს აღდგომის ტაძრის ფონზეა გადაღებული, ზურა ხაჩიძე მაყურებელს 30 მაისს დაგეგმილ “ქუჩის ბიჭების“ კონცერტზე ეპატიჟება. თუმცა, ვიდეოს გამოქვეყნებას მალევე მოჰყვა არაერთგვაროვანი რეაქცია, რის გამოც რესტორანმა სოციალური ქსელიდან პოსტი წაშალა და მოგვიანებით განმარტებაც გაავრცელა
“მეგობრებო, 30 მაისს დაგეგმილი კონცერტის ფარგლებში, ზურა ხაჩიძემ საკუთარი სურვილით მოგვაწოდა ვიდეომიმართვა, რომლითაც აანონსებდა ღონისძიებას.
სამწუხაროდ, ვიდეოს გამოქვეყნებას მოჰყვა უკიდურესად არასასიამოვნო, აგრესიული კომენტარები, რომლებიც სცილდებოდა ჯანსაღი კრიტიკის ფარგლებს და ცალსახად გამოხატავდა ბულინგს.
ჩვენი გუნდისთვის უმნიშვნელოვანესია როგორც თითოეული სტუმრის, ისე თითოეული პარტნიორისა და შემსრულებლის ფსიქოლოგიური კეთილდღეობა. სწორედ ამიტომ, რესტორნის გუნდმა ერთხმად გადავწყვიტეთ ვიდეოს წაშლა – მხოლოდ და მხოლოდ მომღერლის ემოციური და ფსიქოლოგიური მდგომარეობის დაცვის მიზნით.
გმადლობთ იმ ადამიანებს, ვინც მხარს უჭერთ ჯანსაღ კომუნიკაციას და ურთიერთპატივისცემას.
ჩვენ ვაგრძელებთ მზადებას კონცერტისთვის და გპირდებით დაუვიწყარ საღამოს – სითბოთი, მუსიკით და ურთიერთგაგებით სავსეს…“ – ვკითხულობთ რესტორნის მიერ გავრცელებულ კომენტარში.
AMBEBI.GE ზურა ხაჩიძეს პირადად დაუკავშირდა და მომხდარზე მასთან ინტერვიუ ჩაწერა
– საოცარი ამბავი ხდება, შოკში ვარ. რამდენიმე დღით ვიყავი წასული, რეკლამა გავუგზავნე პეტერბურგიდან იმ რესტორანს. როდესაც გამოაქვეყნეს, ვიღაცამ იცნო ტაძარი, რომ პეტერბურგში ვიყავი და ამაზე ატყდა ამბავი. ვინ ამიკრძალა სად წავალ, საიდან რას გავგზავნი, ვისი რა საქმეა, არ მესმის, შოკში ვარ მართლა.
რაღაც კასტაა ჟურნალისტების, ვაიმე, რუსეთიდან გააკეთეთ რეკლამა? – ჩემი გაგიკვირდათ? – პირველად ვიყავი პეტერბურგში დასათვალიერებლად რამდენიმე დღით. საოცარი ქალაქია, ძალიან კულტურული. საოცარი რაღაცები ვნახე და მოვილოცე, რა ვიცი, შოკში ვარ, ისეთი ამბავი მოჰყვა. მაგრამ აღარ მიკვირს, ამათგან არაფერი აღარ მიკვირს, ძირითადად “ნაცმედიები”.
– რესტორანმა საბოლოოდ წაშალა რეკლამა.
– დიახ, იმ გოგომ წაშალა, ინერვიულა, ზურამ არ ნახოსო, რაღაც ცუდი კომენტარები ეწერაო. ხომ იცით, როგორც იციან, მიესევიან, თორემ არც მე მითქვამს წაშალე-თქო. ახლა დადო იმ გოგომ განცხადება, იმიტომ წავშალეთ, არ გვინდა, რომ ჩვენს გვერდზე ბულინგი მოხდესო. განაგრძეთ კითხვა
