„როცა ნიკა დაიჭირეს, გაბუმ გვითხრა ასეთი რაღაც… შეიძლება ნაწყენიც ვყოფილიყავი, მაგრამ ჩემს თავს უფლება არ მივეცი, მეც არასწორად მოვქცეულიყავი“ – რა გაამხილა ნანუკა ჟორჟოლიანმა?

ტელეწამყვანი ნანუკა ჟორჟოლიანი „ტვ პირველის“ ეთერის გადაცემას „შუადღე live“ სტუმრობდა.

ნანუკამ სხვადასხვა თემებზე ისაუბრა, მათ შორის იმაზე, თუ რატომ დარჩა ორი წლის წინ ტელეკომპანია „მთავარ არხზე“.

ვიდეო: „მე ვარ ტელევიზიაში გაზრდილი, ამაზე დიდი სკოლა არ არსებობს საქართველოში“ – ნანუკა ჟორჟოლიანი

„მინდა მაყურებელს ავუხსნა ერთი რამ, როდესაც ვანო ჯავახიშვილი„ ტვ პირველის“ ეთერში გადმოვიდა, მაშინვე გაწყდა ჩემი თანამშრომლობა ტელეკომპანია „მთავართან“. ეს იყო ტელეკომპანია „მთავარის“ გადაწყვეტილება. როცა ნიკა დაიჭირეს. გაბუმ (გიორგი გაბუნიამ) მე და ვანო ჯავახიშვილს გვითხრა, თქვენი გადაცემები უნდა დაიხუროს, იმიტომ რომ რესურსი აღარ გვაქვსო. ვანო აღმოჩნდა თქვენთან, მე კი წავედი და მოვძებნე ფინანსური რესურსი. ამის შესაძლებლობა ნანუკას სულ ჰქონდა, იმიტომ რომ ჩვენ ჯერ კიდევ „იმედში“ ყოფნისას ჩვენი რესურსებით ვახერხებდით მუშაობას. მიუხედავად იმისა, რომ შეიძლება ნაწყენიც ვყოფილიყავი, ჩემ თავს უფლება მაინც არ მივეცი, მეც არასწორად მოვქცეულიყავი და არხს ვუპასუხე იმით, რომ დავრჩი, რადგან ნიკა პატიმარი იყო.

ჩავთვალე, რომ პატიმარი ნიკას პირობებში ჩემი არხიდან გასვლა, სიმშვიდეს არ მომცემდა. ჩავთვლიდი, რომ არ ვარ კარგი გოგო.

ნიკა, რომ ციხიდან გამოვიდა, ისეთი პროცესები დაიწყო, „რუსული კანონის“ გამო ეს ამბავი, ვიღას ახსოვდა, თორემ აუცილებლად გადავხედავდი ჩემს გადაწყვეტილებას.

როდესაც შენი სპონსორები გყავს, თავისუფალი ხარ გადაწყვეტილებაში, ნებისმიერი ლოგოს ქვეშ შეიძლება, გახვიდე ეთერში“, – განმარტავს ნანუკა ჟორჟოლიანი.